Ертегілер әлеміне құштар, ізгілікке сенетін кез келген адам Қуыршақ театрының билеттерін алуға асығады. Мұнда адамның жасына қатысты шектеу жоқ. Театрға келуші әр қойылымнан өзі іздеген жан тыныштығын табады, ерекше көңіл күйге бөленеді! Балалар әлемі ең көңілді, ең шынайы әлем! Ал қоғам осындай тазалыққа құштар!

«ҰР, ТОҚПАҚ!» қойылымына шақырады

16 Желтоқсан 2022

Бүлдіршін қуанышының себепкеріне айналған 87 жылдық қазыналы тарихы бар Алматы Мемлекеттік қуыршақ театры жас жеткіншектерге қазақ халық ертегісінің желісімен сахналанған «Ұр, тоқпақ!» қойылымының премьерасын ұсынды.

Жақсылық пен жамандықтың, адалдық пен арамдықтың ара-жігін айқындайтын бұл спектакльде аңғал да сенгіш, ақкөңіл де мейірімді ақсақал қошақанын іздеп жүріп, тұзаққа түсіп қалған қазды құтқарып қалады. Қарапайым қазды емес, таңғажайып данышпан Қазбайды құтқарған ақсақал мен кемпірі екеуінің өміріне сол сәттен бастап үлкен өзгеріс енеді. Қазбай ақсақалға алғыс ретінде «Піс, қазан», «Құс, есек» және «Ұр, тоқпақ» атты ерекше сиқырлы сыйлықтар ұсынғанымен, жезтырнақтар түрлі адам кейіпіне еніп, ақсақалдың сыйлықтарын тартып алу мақсатында жоспарлар құрады. Дегенмен бұл тұзақтарға қарсы тұрып, ақсақал өз мақсатына жетеді.

Ұлттық дәстүрмен ұтымды безендіріліп, әуезді әнмен, көңілді бимен әрленген ертегі кішкентай көрермендерге қызықты көңіл-күй сыйлап қана қоймай, бала санасының дамуы мен рухани, адамгершілік қасиеттерін бойына сіңіріп, тіл алғыштыққа, тәртіптілікке, шыншылдық пен үлкенге құрмет көрсетуге үндейді.

Қойылымның авторы – белгілі қаламгер, ақын, драматург, бірқатар беделді мемлекеттік сыйлықтардың лауреаты Қасымхан Бегманов. Спектакльдің суретшісі – Алтынай Жүсіпәлі. Қойылымды музыкамен көркемдегендер – Бақберген Байшығаш және Аршын Жолдасхан. Бұл қойылымды театр өнері саласында есімі белгілі, ертегі арқылы баланың шығармашылық қабілетін дамыту, қоғамдық өмірге араласуы жолында аянбай қызмет етіп жүрген, ізденіс еңбегінің негізінде қазақы ертегілерді заманына сай етіп қуыршақ театрының қоржынын толықтырып жүрген режиссер Еркебұлан Қабдыл сахналады.

Қуыршақ өнерінің сан қилы мүмкіндігін пайдалана отырып, кішкентай көрермендерімізге және ересектерге де ерекше әсер сыйлауға асық, жақсылыққа жаны құмар, ертегілер әлемін сезіндіретін Алматы Мемлекеттік қуыршақ театры 18 желтоқсанда барша көрермен қауымды театрға шақырады!

 

Айым НҰРМАН

"Алматы ақшамы" порталы

Сілтеме: https://almaty-akshamy.kz/yr-tokpak-koyilimina-shakiradi