Алматы Мемлекеттік қуыршақ театры қазіргі заманауи тенденцияларды, көркемдік-эстетикалық өзгерістерді, жаһандық әлемдегі жаңа бағыттар мен үздік шешімдерді меңгеру, театрдың бүгінгі тынысын кеңейту жолында халықаралық ірі жобаларға қатысуды негізгі жұмыс барысына айналдырған.
Осы орайда театр ұжымы Қазақстан ғана емес, Түркия, Ресей мемлекеттерімен қатар Еуропа елдерінің де ірі, беделді қуыршақ театр фестивальдарына арнайы шақырту алып, үздіктер қатарынан көрініп жүргендігін баса айта кеткен жөн.
2022 жылы аталған өнер ұжымы Болгариядағы Варна қаласында өткен XVII халықаралық «Алтын дельфин» қуыршақ театрлар фестивалінде әлемдік классиканың озық үлгісі – «Ромео мен Джульетта» (реж. Д.Жұмабаева) қойылы-
мын ұсынып, Гран-при жүлдесін, сонымен қатар театр әртістері Шохан Құлназаров «Ең үздік ер адам рөлі», Ұлан Асанбек және Ұлпан Серік «Ең үздік дебют» аталымдарын иеленген болатын.
Ал биыл Бургас қаласында (Болгария) 30 шілде мен 5 тамыз аралығында өткен ашық аспан астындағы Х халықаралық «Қуыршақ күндері» атты фестивальға арнайы жолдама алып, Құралай Ешмұратованың режиссерлігімен сахналанған «Қуыршақ думан» қойылымымен қатысты.
Сонымен қатар Х халықаралық «Қуыршақ күндері» фестивалі аясында театр ұжымы Бургас қаласының мэрі – Димитър Николовтың арнайы қабылдауында болып, болашақтағы бірлескен жобалар тұрғысында жоспар құрып талқылады.
Бургас мемлекеттік қуыршақ театрының басшысы Христина Арсеновамен шығармашылық кездесу ұйымдастырылып, заманауи техникалық жабдықтарды қолдана күрделі де сапалы қуыршақтардың дайындалуынан, жүргізілуі мен сақталуынан, театр тынысының хабар беретін экскурсиямен жалғасын тапты.
Аталған фестивальда елімізден бөлек Болгария, Нидерланд, Румыния мемлекеттерінен іріктелген таңдаулы 13 ұжым өнер көрсетті. Дүбірлі додада Алматы Мемлекеттік қуыршақ театры Бургас қаласы әкімдігінің шешімімен Гран-при жүлдесін жеңіп алды.
Маржан ӘБІШ
"ЕГЕМЕН ҚАЗАҚСТАН" газеті порталы
Сілтеме: https://egemen.kz/article/346936-teatrdynh-quanyshy