Ертегілер әлеміне құштар, ізгілікке сенетін кез келген адам Қуыршақ театрының билеттерін алуға асығады. Мұнда адамның жасына қатысты шектеу жоқ. Театрға келуші әр қойылымнан өзі іздеген жан тыныштығын табады, ерекше көңіл күйге бөленеді! Балалар әлемі ең көңілді, ең шынайы әлем! Ал қоғам осындай тазалыққа құштар!

Шәмшіге арналған премьера

9 Қараша 2020

Жақында 86-маусымының шымылдығын түрген Алматы Мемлекеттік қуыршақ театры алғашқы премьерасын бел­­гілі композитор, Қазақстанның халық әртісі Шәмші Қал­даяқовтың 90 жылдығына арнап, ән еркесінің мерейтойына ерекше тарту жасады. Жеті ай бұрын карантинге жабылса да, жас көрерменімен байланысын үзбей, онлайн форматта жұмыс істеген қуыршақ театрының «Өмір-өзен» атты бұл қойылымы бір сағатқа жуық ән падишасының сырлы әуенімен сусындатып, ұлттық эстрада өнеріне жаңалық әкелген өткен жылдарға сапар шеккізіп, сахна арқылы саяхат жасатты.

Қойылым ең алдымен көрер­мен­дердің өзіне Шәмші әндерін орындатудан басталды. Ал дүйім қазақ даласында, әсіресе ересек, егде қауымның арасында Шәмшінің әнін шырқамайтын, құлаққа сіңген таныс әуен естіл­генде, тосырқап тұрып қалатын адам бар ма, сірә? Сезім қылын шертіп, жүректі лүпіл қаққыза­тын сағынышқа толы лирикалық ән­дердің бір-бір шумағын әр кө­рермен жүргізуші әртіспен бір­ге шабыттана шырқап, шалқыған көңіл тек шымылдық ашыл­ғанда ғана сабыр тауып, ба­сылғандай болды. «Ақ бантик», «Қайықта», «Ана туралы жыр», «Арыс жағасында», «Кешікпей келем деп ең», «Өмір-өзен» – композитордың қай әнінің де ком­позициялық құрылымы, та­қы­рыбы сахналық қойылымға өз-өзінен сұранып тұрғандай. Режиссер Еркебұлан Қабдыл Шәм­шінің халық арасына кең та­раған әндерінің мазмұнын бір арнаға тоғыстырып, қос ға­шық­тың махаббат хикаясына негіздеген. Ал спектакльдің су­ретшісі – Алтынай Жүсіпәлі.

Қуыршақ театрының аядай за­лы әп-сәтте ән падишасының әдемі әлеміне айналып шыға кел­ді. Режиссер Е.Қабдылдың жас көрерменге Шәмші әндерінің өмір­­­шеңдігін, талант табиғаты­на жа­­сырынған сырды түсіндіргісі кел­генін, композитор әндерін на­си­хаттауды мақсат тұтқанын аң­ғармау мүмкін емес. Қазақ өне­рінің тұтас бір дәуірін өр­кендету­ге айырықша үлесін қос­қан ән серкесінің музыкалық мұрасы бүгінгі жас балаларға жат болмай, керісінше, жүрегінен орын тауып жақындай түсуі үшін сахналық тә­сілдерді кеңінен пай­даланған. Ән табиғатына сай, образға лайық, өте сәнді тігілген қуыршақтардың қатысуымен орындалатын әрбір ән жанды әсер туғызады. Ұлттық құнары басым, ән өзегінен ұшып шық­қан анаға, досқа, туған жерге де­ген сүйіспеншілік, мейірім, сый­­ластық, ізгілік сезімі бала бо­­­йында жаңадан қалыптасып ке­ле жатқан адамгершілік қасиет­тер­мен ұштасып, отаншыл азамат болып өмір сүруге жете­лей­тіні сөзсіз. «Ең басты мақса­ты­мыз – Шәм­ші әндерін өскелең ұр­пақ­қа насихаттап, ұлттық құнды­лық­тарды дәріптеу. Төл өнерін танып өскен баланың келешекте өз елі мен жеріне деген махаббаты мол болады», дейді Еркебұлан Қабдыл.

Балаларға Шәмші Қалдаяқов­тың әндерін таныстыру қойы­лымы сахнадағы сәтті қадамның бірі. Спектакльде Мәдениет сала­сының үздігі Мақсат Ка­ма­лов және «Сахнагер» ұлт­тық театр байқауы «Үміт» номи­на­циясының иегері Арай Сақта­ға­нова екі жастың махаббаты ли­ниясында ойнаса, Арайлым Ба­йыр­бекова, Руслан Әбу, Шоқан Құл­назаров, Бақытжан Каюов, Әсем Чайалканова, Салтанат Тө­ре­бай, Ғалым Амангелдіұлы, Гүл­баршын Өнімбай сынды жас әр­тістер жарты ғасыр бойы қала­ны да, даланы да тербетіп келе жат­қан әсем әндерді тамылжыта орындады.

Айта кеткен жөн, қуыршақ теат­ры бұған дейін ақын Мұқағали Мақатаевтың шығармашылығын арқау еткен «Мен деп ойла...» ат­ты қойылымды сахналаған. Қа­зақтың тағы бір өнер иесі Шәмші Қалдаяқовқа арналған кезекті қойылым – осы туындының заң­ды жалғасы.

www.egemen.kz